ma en jan

(if on mobile, tilt your phone to the side)

lipamanka li pali e ni
　　　 ma en jan

tenpo ale jan la jan li lon ma
jan li alasa lon ma
jan li lape lon ma
jan li pali
　 li utala
　　　 lon ma
　 li pona e ma

jan li lili mute li sin
　 la ona li sona e ni
　　 kasi seme li pona tawa mi
　　 mi ken moku e seme
lipu li lon ala
taso
jan li pana e sona ni tawa lawa

ma li tomo jan
jan ale li ken pali e tomo
tomo li lon ma
jan li lon tomo
jan ala li jo ala e tomo

tenpo mute jan li lon weka tomo
jan li musi
　 li mu
　 li toki
jan li moku e kasi
　　　 e soweli
　　　 e soko

jan li pona tawa ma
ma li pona tawa jan
jan en ma li pona

taso tenpo poka la ni^ li lon ala
jan li pilin mute e ni
　 ma en jan li ante
　 jan li lon ma
　 jan li ike e ma
　 ma o pona la jan o weka
ni>^ o lon ala
ma li ken pona lon weka jan
taso ma li ken pona lon jan kin

jan mute li toki e ni
　 ma mute ni li lon
　　 kasi mute li lon ona
　　 soweli mute li lon ona
　　 soko mute li lon ona
　 mi wile awen e soweli
　　　　 e soko
　　　　 e kasi
　 taso
　 ni^ li ken ala lon tenpo niv<
　　 jan li lon ma
　 la mi o weka e jan
ni>^ li lon ala a
ma mute la jan li ike e ma
taso ni^> li jan pi ale ala
jan ni li lon
　 ona li pona e ma
　　 li pona tawa ma
tenpo mute
　 la jan ike li weka e jan ni^<
　　　　　 ztan ma ona
ni^> a li ike suli
ni li ma pi jan pona
　　　 pi jan ike ala

sina wile pona e ma
　 la nasin wan taso li lon
　 o pana e wawa tawa jan ma
jan ni^> li ken pona e ma
　　 li pona e ma lon tenpo pini
　　 li awen pona e ma
　　　　 o pona tawa ma

lipamanka
ma